Synopsis: Sovereignty Restoration Day is evidence of the good morals and ethics of the crown of Great Britain. Welina e nä makamaka heluhelu o Kauakükalahale, ‘oiai, ua hala iho nei ka Lä Ho‘iho‘i Ea, ka lä 31 ho‘i o Iulai,
Synopsis: Sovereignty Restoration Day is evidence of the good morals and ethics of the crown of Great Britain.
Welina e nä makamaka heluhelu o Kauakükalahale, ‘oiai, ua hala iho nei ka Lä Ho‘iho‘i Ea, ka lä 31 ho‘i o Iulai, e pa‘i ‘ia ana kahi mele i haku ‘ia no ua lä nei i kapa ‘ia ‘o Mele Hoi Hou Ana a i pa‘i ‘ia i loko o ka nüpepa Ka Nonanona i ka lä 5 o Kepakemapa. Penei ia.
(Leo, E Ola ke Alii i ke Akua.)
1. E ko makou alii!
Mahalo ‘ka moi, I keia la!
E mau kou ola nei!
E mau kou aupuni!
No na hanauna hoi, I oni paa.
2. Nani ka inoa maikai!
Me kona aina nae!
Toma ke koa!
Mahalo kou maikai, Kou wikiwiki mai!
Maluna o ke kai, E kuu ‘na paa!
3. Hiilani i ke Lii!
Iehova ka Moi, E hapai no Nui ke kupinai!
Nui ke mele nae!
I mau ka pomaikai Ia oe no. Honolulu, Oahu Iulai 31, 1843.
A ua huki ‘ia mai kahi ‘ölelo a ‘Akimalala Kamaki i unuhi ‘ia a pa‘i ‘ia i loko o ia nüpepa ho‘okahi. Penei ia, “ke hai aku nei au me ka hoomaopopo, Aole no au e ae aku i ka haawi ana mai i ke Aupuni Hawaii i ka la 25 o Feberuari iho nei 1843; aka, ke hooia aku nei au i ke Alii Kamehameha III, oia ke Alii maoli nona ua pae aina nei. Ke hai aku nei no hoi au i ua alii nei, he aloha a he makemake wale no ka manao o Kealiiwahine o’u ia ia; a ke makemake nui nei ua Aliiwahine la e hanaia aku ai o Kamehameha III i Alii Kuokoa, e waiho ana i ka hoomalu aina ma kona mau lima, i hookupuia’i ka pomaikai o kona mau aina ma kana hooko kanawai ana mamuli o ka pono.” ‘O ka hana ia i kü i ka pono. A no ke aha lä i hana like ‘ole ai ‘o ‘Amelika. Mai hana like ‘o ‘Amelika, ma ka ho‘ouna ‘ana mai iä Blount no ka noi‘i ‘ana. ‘A‘ole na‘e i ho‘okö pono ‘ia, ‘oiai, ‘a‘ole i ho‘iho‘i ‘ia mai ke ea ma hope o ka ho‘omaopopo ‘ana i ka hana hewa. Inä he aupuni mö‘ï ‘o ‘Amelika, inä ua ho‘i ‘o Lili‘uokalani i ke kü ‘ana i ka moku. ‘A‘ole ho‘i e hihi, he mau pegana ka hapanui o nä luna o ‘Amelika i ia manawa, e like me Pelekikena Wiliama Makinalë, i huli kua i ka hopena o ka noi‘i ‘ana o Balauna a me ka makemake o Pelekikena Kaliwilana.
Nui ka mahalo o ko ‘oukou mea käkau i nä küpuna i ko läkou ho‘omanawanui ‘ana a me ka hana ‘ana i mea e mau ai ka lähui a me nä mo‘olelo. A nui nö ho‘i ka mahalo o ko ‘oukou mea käkau i ka po‘e näna i mälama i nä hana o këlä Pö‘aono aku nei ma Kamaki Kuea a me ka Pö‘akolu nei kekahi, a pëlä pü me nä hana like ‘ole e a‘o ana i ka lehulehu e pili ana i ua lä nei a me ka hana e pono ai i këia manawa a e mau ke ea o ka ‘äina i ka pono.
[He ho‘omaika‘i këia iä Kähealani Lono, he haumäna laeo‘o o Kawaihuelani, i hö‘ike a‘e nei i ka Pö‘akolu nei, i käna hana noi‘i no käna pepa laeo‘o i kapa ‘ia He Mana Ko Ka ‘Ölelo Makuahine: Ke Kü‘ë ‘Ana I Ko Hawai‘i Ho‘okolonaio ‘Ia ‘Ana Ma O Ke Ola A Me Ka Ho‘omau ‘Ana O Kona ‘Ölelo Makuahine, a me ke küpale ‘ana a puka akula.]
• E ho‘ouna ‘ia mai nä leka iä mäua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei: kwong@hawaii.edu, rsolis@hawaii.edu
