Aunty Marvlee Naukana-Gilding

Synopsis: The pouhana of Kamakaküokalani has collapsed, but because of that pouhana, Aunty Marvlee Naukana-Gilding, Kamakaküokalani will not.

He lä piha kaumaha ka lä 5 o ka mahina ‘o Iulai i hala iho nei. Ma ua lä nei, ua hiolo iho nei kahi pouhana o Kamakaküokalani. ‘O ia ho‘i ka lä i hala iho nei ‘o Aunty Marvlee Këhaulani Naukana-Gilding. Inä ua komo ‘oe i ka polokalamu Hälau ‘Ike Hawai‘i, ua kama‘äina nö ‘o Aunty Marv iä ‘oe. ‘O Aunty Marv ke käkau ‘ölelo mua loa o ka polokalamu Hälau ‘Ike Hawai‘i. Ua ho‘omaka kona hana ‘ana ma laila i ka makahiki 1982. A ua möakäka kona käko‘o ‘ana i ka ho‘ona‘auao ‘ana, ‘oiai, ua ‘imi akula ‘o ia i ka na‘auao a loa‘a maila ke kekelë laepua, a ma hope mai o këlä, ‘imi akula ‘o ia i ke kekelë laeo‘o ma ke kälai waihona puke a loa‘a. A ma muli o ia kekelë laeo‘o, ua lilo ‘o Aunty Marv, ‘o ia ke kahu puke o ka hale waihona puke o Kamakaküokalani. A ma laila ‘o ia i hana ai a kona ho‘omaha ‘ana mai ka ‘oihana aku.

Ua nui loa kona mau makahiki i hana ai ma laila, a nui nö ho‘i nä haumäna äna i launa pü ai. A ‘a‘ole i kana mai kona aloha i ia mau haumäna, a he mälama käna iä mäkou. A ua ha‘aheo nö ‘o ia i ka holo mua o mäkou haumäna ma nä alahele a mäkou i hele ai. A ma muli o ia ‘ano ona i kapa ‘ia ai ‘o ia ‘o Aunty Marv, a kapa mai ‘o ia iä mäkou ‘o “Bebe.” He makua aloha nui  ‘o ia no mäkou, a pëlä pü i ko mäkou lilo ‘ana i kumu ma Kamakaküokalani a ma kekahi ke‘ena o ke Kulanui o Hawai‘i o Mänoa. Ke ‘ike ‘o ia, ua pilikia paha ‘oe, ma laila ‘o ia me ka pepeiao ho‘olohe a me ka ‘ölelo a‘o a me ka ‘ölelo hö‘olu na‘au paha. He wahine piha aloha nö ‘o ia.

A i këia makahiki nei, ua kau ‘o Aunty Marv i ka hano häweo. Ua lilo akula iä ia ka Makana I Ulu I Ke Kumu no kona küpa‘a ‘ana ma ka ho‘ona‘auao ‘ana i ia mau makahiki he nui a me ke aloha i kona lähui a me nä haumäna a pau äna i launa pü ai, käna mau keiki ho‘i. He kumu alaka‘i helu ‘ekahi ‘o ia no käkou a pau a me nä pua o këia hope aku.

Aia ana kona ho‘olewa i ka lä 23 o Iulai makahiki 2013 ma Diamond Head Memorial Park, 529 18th Avenue. E ho‘omaka ana ke kipa ‘ana i ka hola 9:00 o ke kakahiaka. A ho‘omaka ka ha‘i ‘ölelo ho‘ole‘a i ka hola 10:00. A ‘o ke kanu ‘ana, aia i ka hola 12:45 ma Diamond Head Memorial Park. E hö‘ike paha i ke aloha iä Aunty Marv ma www.hawaiianmemorialparkmortuary.com/obituaries/Marvlee-Naukanagilding/#%21/Obituary.

E Uncle Albert, me ‘oe a me kou ‘ohana ko mäua aloha. A mahalo e Aunty Marv no kou lilo ‘ana i ‘ohana no mäkou a me kou aloha nui ‘ana iä mäkou.

Nui ka mahalo o ko ‘oukou mau mea käkau iä Lehua Nishimura a me käna mau keiki, Kanehe läua ‘o Kapa‘a, no ko läkou kökua ‘ana iä Aunty Marv ma ka mea i hiki iä läkou i ia lä 5 o Iulai. Aloha nö ka ‘ike ‘ana i kahi ulia pö‘ino, akä, ua hana pono nö läkou. A he mea maopopo, ua nui ke aloha a me ka mahalo o Aunty Marv iä läkou.

• E ho‘ouna ‘ia mai nä leka iä mäua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei: kwong@hawaii.edu, rsolis@hawaii.edu