Synopsis: The state and University of Hawaii can combine landscaping and sustainability to help the community. Welina e nä hoa makamaka. I ka heluhelu ‘ana aku i ke po‘o mana‘o e kau a‘ela i luna, ua no‘ono‘o ihola paha ‘oukou,
Synopsis: The state and University of Hawaii can combine landscaping and sustainability to help the community.
Welina e nä hoa makamaka. I ka heluhelu ‘ana aku i ke po‘o mana‘o e kau a‘ela i luna, ua no‘ono‘o ihola paha ‘oukou, “He aha ia mea ‘o ka ulu pono a mau loa?” ‘O ia ka ‘ölelo a ko ‘oukou mea käkau i koho ai no ka “sustainability”. ‘O ka mälama ‘äina paha kekahi ‘ölelo küpono. ‘Akahi nö a lilo ia mea ‘o ka ulu pono a mau loa i mea nui. No ke aha ia i lilo ‘ole ai i mea nui ma mua loa, he 50 makahiki aku nei? ‘A‘ole ho‘i e hihi, ua hala ia, a no laila, e holo mua käkou. ‘O ka ulu pono a mau loa, he mea ia e pono ai käkou o këia au e ka‘a aku nei, a me nä pua a käkou ma këia hope aku. A ‘o ia nö paha ke kumu o ke aupuni moku‘äina o Hawai‘i i ho‘okumu ai i ka hui hana pahuhopu ulu pono a mau loa no ka makahiki 2050. A he mea nui nö ho‘i ia i ke Kulanui o Hawai‘i, ‘o kekahi pahuhopu, ‘o ia ka hana e ulu pono ai a mälama pono ‘ia ai ka uila, ka wai, ka pepa a me ia waiwai aku, ia waiwai aku.
He nui nö paha nä mana‘o a me nä ‘ano o ia mea ‘o ka ulu pono a mau loa. A ‘o kekahi, ‘o ia ka hana ‘ana a loa‘a ka mea ‘ai e ola ai nä kino o käkou. A no laila i kupu ai kekahi nïnau i loko o ko ‘oukou mea käkau, ‘o ia ho‘i, i ke kanu ‘ana o ke aupuni moku‘äina, ke külanakauhale paha a me ke Kulanui o Hawai‘i i ka lä‘au no ka ho‘onani ‘ana aku i ka hi‘ohi‘ona ‘äina, no ke aha e kanu ‘ole ‘ia ai ka mea kanu ‘ai ‘ia, ‘o ke kumu ‘ulu ‘oe, ‘o ke kumu manakö ‘oe, ‘o ke kumu laikï a pëlä aku. Ke pa‘ipa‘i pono ‘ia ia mau kumu ‘ulu, e nani nö ke nänä aku, a e ha‘aha‘a loa paha ka hua ‘ai. A ‘o nä hua e loa‘a ana, e hä‘awi ‘ia aku paha i ka po‘e ‘ilihune a me ka po‘e kuewa paha, e kü‘ai ‘ia aku paha.
‘A‘ole paha e kanu ‘ia ke kumu niu, no ka mea, ‘o ka nui o nä kumu niu ma ka ‘äina aupuni, ‘oki ‘ia ka hua, ‘a‘ohe hua, aloha nö. ‘A‘ole ia he hana e ulu pono ai a mau loa. E hopohopo ana paha o hä‘ule ka hua a pä ke po‘o o kekahi. Inä pëlä, e hana i mau hö‘ailona i ‘ole e kü ke kanaka ma lalo o ke kumu niu.
Inä ‘a‘ole makemake ke aupuni e kanu ‘ia aku ka mea kanu, e kanu ‘ia aku paha ka lä‘au e pono ai ka lapa‘au ‘ana a me nä ‘ano hana like ‘ole paha, ‘o ka ulana ‘ana, ‘o ke kuku kapa paha a pëlä aku. Akä, ma mua o ke kanu ‘ana aku, e kama‘ilio aku paha ke aupuni i ka po‘e akamai ma ia mau mähele i koho pono ‘ia ka lä‘au e kanu ai. A laila, ‘o ka lä‘au, ka lau, a pëlä aku, e loa‘a ana, e hä‘awi ‘ia aku i nä känaka e ho‘ohana ana, e kü‘ai ‘ia aku paha.
A ‘o kekahi, e hana paha ke aupuni i mau pä a puni këia pae ‘äina, kahi e kiloi ‘ia ai nä ‘äpana kumu lä‘au ke kua ‘ia. I kekahi manawa, i ke kua ‘ia ‘ana o kekahi kumu lä‘au, ua kiloi wale ‘ia ma ka‘e o ke alanui, a ma ka pömaika‘i, ua ‘ike ‘ia ka waiho wale ‘ana o ia mau ‘äpana lä‘au e kekahi hoa, a lawe ‘ia akula. Akä, inä ‘a‘ole i ‘ike ‘ia, inä ua pau ka pono. Na wai lä i kiloi wale aku i ia mau ‘äpana lä‘au? Akä, inä i loa‘a kahi ‘äina e kiloi ‘ia ai ka ‘äpana lä‘au makemake ‘ole ‘ia, he mea maika‘i nö ia, a ‘o ka po‘e kälai, e ki‘i wale aku.
Inä e hana aku nö ke aupuni pëlä, he mea maika‘i ia no ke kaiäulu.
