Ku‘u wahi holoholona ‘ähiu

• Synopsis: Some things in life might be irritating and troublesome, but with trials and tribulations comes time for learning and growth.

Welina mai e nä hoa makamaka heluhelu o Kauakükalahale. E ha‘i mai i ku‘u nane, ku‘u wahi holoholona ‘ähiu hele pü me ke kanaka, a inä nö e loa‘a, e pepehi ‘ia ana a make, a inä nö na‘e ‘a‘ole e loa‘a, e ho‘iho‘i ‘ia i ka hale e noho pü ai. Na ka ‘eleu nö ia e ho‘omaopopo. ‘O wai lä ho‘i ‘oukou e nä keiki o Kalae mai?

I këlä pule aku nei, ua pü‘iwa maila ko ‘oukou wahi mea käkau. I ke kalaiwa ‘ana i kekahi pä‘ina, nänä akula au i ke aniani kïlohi. ‘O ko‘u ‘ike akula nö ia i nä hoa li‘ili‘i he nui hewahewa e mana‘o nei paha e hele pü mai me a‘u i ka pä‘ina. I ia ‘ike ‘ana i ua mau hoa li‘ili‘i nei, pau ihola ko‘u ‘i‘ini e hele i ka pä‘ina. ‘O ka huli koke akula nö ia a ho‘i aku i kauhale. ‘A‘ole i kono ‘ia ua po‘e hoa nei e hele i ka pä‘ina a ‘a‘ohe po‘e ma ka pä‘ina e hau‘oli i ka ‘ike mai i këia ‘ano hoa li‘ili‘i.

No ia pule holo‘oko‘a, ma kahi o nä hana ma‘a mau, he nui nä hana e pono ai ka ho‘oma‘ema‘e ‘ana i nä mea i ho‘ohaumia ‘ia e ua po‘e hoa li‘ili‘i nei. ‘O nä lole ‘oe, ‘o nä uluna ‘oe, ‘o ka moena, a me nä mea like he nui aku nö. Eia na‘e, ‘o ka mea i ‘oi a‘e kona komo hewa ‘ia, ‘o ia nö ko‘u lauoho. Ua pono e ‘ako ‘ia ku‘u lauoho lö‘ihi, ka mea ku‘uwelu mau mai ma luna o ko‘u mau po‘ohiwi, a pökole.

Ma muli o ke kaumaha, he nui hou aku nä hana ma‘a mau i hana ‘ole ‘ia. I ko‘u ‘ike ‘ana i ka ‘eu mai o ua mau hoa nei i luna o ko‘u lauoho, ua kelepona au i ku‘u kaikaina. Noho pü mäua i ka lumi ho‘okahi, no laila, hö‘ike koke akula au iä ia i hiki iä ia ke maka‘ala ‘o ka hö‘ea mai o ua po‘e hoa nei ma kona lauoho. ‘A‘ole na‘e pëlä. Ua pakele ‘o ia i ia luhi!

Nui ke kökua o ku‘u kaikaina a me ko‘u mau hoa aloha i ko‘u wä küpiliki‘i. I këlä me këia lä, kahi maila läkou i ko‘u lauoho me ka huli aku ho‘i i nä ‘uku. Eia hou, ua maopopo iä läkou he mea ho‘olu‘ulu‘u na‘au ka ‘ako ‘ia o ko‘u lauoho a pökole, a no laila, ua lilo läkou i hoa ‘alo pü i ka ‘ïnea a ua paipai mau mai ia‘u a lana mai ka mana‘o no ka hiki hou mai o nä lä hau‘oli. Ua kökua mai ho‘i läkou i ka hana ‘ana i ka‘u mau ha‘awina i hö‘alo ‘ia ma muli o ka nui o ke kaumaha.

Eia mai nö ka mea ‘äpiki. ‘A‘ole ia he mea mau ia‘u ka hö‘ike aku i ko‘u mahalo i ka po‘e näna au e kökua mai. He mana‘o ko‘u ua lawa au ia‘u iho a ua ‘ae‘oia ho‘i. Ma muli na‘e o ka nui o ke kökua a ko‘u mau hoa a me ko‘u kaikaina i ka ho‘omanawanui ‘ana i këia pilikia, no laila, ua maopopo, ke ‘ole ko läkou kökua, pilikia maoli nö au. No laila, he wahi mahalo këia i ko‘u mau hoa aloha a me ko‘u kaikaina. He mea nui ka mahalo ma ka mälama ‘ana i nä pilina maika‘i o nä hoa a me nä ‘ohana, a pau pü ho‘i me ke Akua. Mai nänä wale i nä mea ‘ino. Ma këlä me këia mea pilikia, aia kekahi ha‘awina e a‘o ai.

• E ho‘ouna ‘ia mai nä leka iä mäua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei: kwong@hawaii.edu, rsolis@hawaii.edu