Ka ‘Aha Hula No Ko Nä ‘Äina Like ‘Ole

Synopsis: The 6th Annual International Waikïkï Hula Conference will be held from May 17 to 19. It pays tribute to 50 years of the Merrie Monarch Festival. Registration is open until midnight May 1.

Welina e nä makamaka heluhelu. Nanea nö paha nä maka a me nä pepeiao i ka hula i nä lä i hala iho nei. Ua nui ka mahalo i nä moho Miki Aloha Hula näna i hö‘ike mai i ko läkou aloha i ka hana mai nä küpuna mai. A he ho‘omaika‘i iä Manalani Mili Hokoana English o ka Hälau Nä Lei Kaumaka O Uka, ‘o ia ka Miki Aloha Hula hou. A pëlä pü ka ho‘omaika‘i ‘ana i nä wähine o nä külana ‘ehä ma hope ona, ‘o Sloane Makana West o ka Hälau Kekuaokalä‘au‘ala‘iliahi, ‘o Jasmine Kaleihiwa Dunlap o ka Hula Hälau ‘O Kamuela, ‘o Chalei Malianapuaonahala Pu‘ulei McKee o Ka Lä ‘Önohi Mai O Ha‘eha‘e a ‘o Whitney Pi‘ilani Baldwin Schneider-Furuya o ka Hälau I Ka Wëkiu. A i këia ahiahi ana käkou e ‘ike hou ai i nä kino ‘olu i ka hula. A e ‘ike auane‘i i ka mea näna e lawe i ka inoa moho a lilo.

A he manawa küpono këia e ho‘olaha ai i ka ‘Aha Hula No Ko Nä ‘Äina Like ‘Ole ma Waikïkï, e hiki koke mai ana, mai ka lä 17 o Mei a i ka lä 19. A ‘o ke ono këia o ka makahiki e mälama ‘ia ana, a ‘oiai, ua piha nä makahiki he 50 i ka Ho‘okükü Hula ‘o ka Mö‘ï Puni Le‘ale‘a, e ho‘oheno ‘ia ana ia ho‘okükü.

‘A‘ole paha ‘oukou i lohe iki no këia ‘aha ma mua? He ‘aha këia i hämama kona ‘ïpuka no nä känaka hula like ‘ole, mai ka ‘akahi ‘akahi a i ke kumu hula nö paha, a no ke kanaka puni hula nö ho‘i paha. He 80 papa a ‘oi aku paha, e mälama ‘ia ana i loko o ia mau lä ‘ekolu. E a‘o ‘ia ana ka hula kahiko, ka hula ‘auana, ke mele, ke oli, ka ‘ölelo Hawai‘i, ka hana ‘ana i ka pä‘ü lä‘ï a me nä pono hula, a me kekahi mau mea hou aku. He keu aku ana ia a ka maika‘i.

A he nui nö nä loea näna e a‘o mai ana i ia mau mea.

Ma ka Hale Mälama ‘Aha ana e mälama ‘ia ai nei ‘aha hula. ‘O ka uku e komo ai ma loko o këia  ‘aha, he $385. A no ka po‘e kama‘äina o Hawai‘i nei, he $250 wale nö. He emi wale nö ia no nä momi e loa‘a ana i ka hiki ‘ana aku i laila. He 40 mau loea hula a loea hana no‘eau paha e a‘o ana i kä läkou ‘ai me kä läkou i‘a. A he manuahi ke kau ‘ana aku ma luna o ke ka‘a lawe ‘öhua mai nä hökele like ‘ole o Waikïkï a i ka Hale Mälama ‘Aha a me ka ho‘i hou ‘ana aku i ka hökele.

A ma loko o ka Hale Mälama ‘Aha, aia ana kahi holoë piha i nä känaka e kü‘ai ana i nä pono hula like ‘ole a me nä ‘ano mea like ‘ole i hana ‘ia ma Hawai‘i nei.

E ‘eleu ‘oukou e nä makamaka heluhelu, no ka mea, e pau ana ke käkau inoa ‘ana i ke kulu ‘ana iho o ke aumoe i ka lä mua o Mei. A inä he 10 a ‘oi mau känaka o ka hui e komo ana i nei ‘aha, e emi mai nö ka uku komo. No kahi ‘ike hou, e kipa aku i ka ‘ao‘ao pünaewele www.waikikihulaconference.com a i ‘ole ia facebook.com/InternationalWaikikiHulaConference.

rsolis@hawaii.edu, kwong@hawaii.edu