E ‘ike ana paha ‘o Obama i ke ali‘i nui o O‘ahu

Synopsis: President Obama seems certain about what to do in Syria, let’s hope he and Congress don’t meet up with the ali‘i nui of O‘ahu.

Welina e nä makamaka heluhelu. Ua lilo ka hana ma Kilia i mea kama‘ilio nui ‘ia, ‘o ia ho‘i, ma ka lä 21 o ‘Aukake, ua make akula he 1,400 mau känaka o Kilia, a ‘oi aku paha, i ka mea kaua kemika. Ke kuhi nei kekahi mau känaka, na ka Pelekikena o Kilia, na Bashar al-Assad ia hana mäna‘ona‘o. Akä, he hö‘ole kä Bashar al-Assad, ‘a‘ole näna.

‘O ka Pelekikena Barack Obama kekahi e kuhi nei, na Bashar al-Assad nö. A ua lilo aku nei ho‘i ia i pulakaumaka nona. Aia ‘o ia e ‘imi aku ana i ka ‘ölelo käko‘o a nä luna o nä ‘äina ‘ë i ka ho‘ouka kaua ‘ana aku me Kilia. He käko‘o nö ‘o Palani, akä, hö‘ole ihola ‘o Lükia a me Kina. Känalua ka Uniona ‘Eulopa.

‘Eä, kau ka weli i ka mea kaua kemika, ‘oiai, ‘o ka hopena, ke ho‘ohana ‘ia ke kemika, he keu aku ia a ka mäna‘ona‘o. A ‘o ke kanaka a aupuni paha, näna e ho‘ohana i ke kemika no ka ho‘omake ‘ana i ke kanaka, he keu aku ‘o ia a ka loko ‘ino. A no laila, ‘o ia paha ke kumu e ho‘oikaika nei ‘o Obama i ke noi i nä luna o nä ‘äina ‘ë i ke käko‘o ma ka ho‘ouka kaua ‘ana ma Kilia. ‘Auhea ‘oe, e Obama, e akahele, o ‘ike auane‘i ‘oe i ke ali‘i nui o O‘ahu, ‘o Käkuhihewa.

A ke ‘ole e kuhihewa ko ‘oukou mea käkau, ‘a‘ole i makemake ‘o Obama, e like käna hana me kä Keoki Buki, a ‘o ia nö kona mea i waiho aku ai i ia nïnau i mua o ka ‘Aha ‘Ölelo. Akä, ‘o ka hopena wale nö paha, e nui ana nä mamo a Keoki Buki, ‘oiai, e ‘ike ana paha läkou a pau i ke ali‘i nui kaulana o O‘ahu nei. ‘O ko Keoki Buki kuhi hewa, ma ka mea kaua ho‘omake kinikini, a ‘o ko Obama mä kuhi hewa paha, ma ke kanaka i ho‘ohana i ka mea kaua kemika.

Hau‘oli ko ‘oukou mea käkau i ka heluhelu ‘ana iho i ka ‘ölelo a ke Kenekoa Brian Schatz, ‘o ia ho‘i, e hö‘ole aku ‘o ia i ka ‘ölelo ho‘oholo a ka ‘Aha Kenekoa e ‘äpono ana i ka ho‘ouka kaua ma Kilia. ‘O kona mana‘o, ‘a‘ole ka ha‘ina ‘o ka ho‘ouka kaua. ‘O ko Schatz pilikia, e launa paha ‘o ia me Käkuhihewa, no ka mea, he mana‘o kona no Bashar nö ia hana.

‘O ka Lunamaka‘äinana Colleen Hanabusa, wahi äna, ‘a‘ole i lawa ka ‘ike hö‘oia‘i‘o äna i ‘ike ai, a no laila, ‘a‘ole ‘o ia e käko‘o i ka ho‘ouka kaua. Mahalo iä ‘oe e ka Lunamaka‘ainana Hanabusa i kou no‘ono‘o pono ‘ana, a no kou lilo ‘ole ‘ana i mamo na Keoki Buki.

He hana mäna‘ona‘o ka ho‘ohana ‘ana i ke kemika no ka ho‘omaka‘u ‘ana i ke kanaka. Akä, ‘o ka mea nui paha, ‘o ia ka hö‘oia‘i‘o ‘ana i nä mea a pau e pili ana i ia hana a ‘ike maopopo i ka hana i kuhi ‘ia i ‘ole ‘oe e ‘ike aku i ke ali‘i nui o O‘ahu.

• E ho‘ouna ‘ia mai nä leka iä mäua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei: kwong@hawaii.edu, rsolis@hawaii.edu

0 Comments

Your email address will not be published. Required fields are marked *

*

By participating in online discussions you acknowledge that you have agreed to the TERMS OF SERVICE. An insightful discussion of ideas and viewpoints is encouraged, but comments must be civil and in good taste, with no personal attacks. If your comments are inappropriate, you may be banned from posting. To report comments that you believe do not follow our guidelines, send us an email.